الارشيف / ثقافة وفن / التحرير

إلهام شاهين تكشف أسرارها لـ«فاهيتا»: «أنا مديونة للبنوك وبلبس شنط مضروبة»

  • 1/2
  • 2/2

الفنانة إلهام شاهين، بدأت حياتها الفنية في نهاية السبعينيات بمسرحية "حورية من المريخ"، قدمت العديد من الأعمال السينمائية، منها "أمهات فى المنفى، رمضان فوق البركان، الهلفوت، سوق المتعة، يا دنيا يا غرامى، والجنتل"، ومن المسلسلات "أخو البنات، قال البحر، حتى لا يختنق الحب، ليالى الحلمية، نصف ربيع الآخر، البرارى والحامول، الحاوى، سامحونى ما كانش قصدى، مسألة مبدأ، وقصة الأمس".

"إلهام" كشفت، مساء أمس السبت، عن الكثير من أسرار حياتها الفنية والشخصية، خلال لقائها ببرنامج "أبلة فاهيتا لايف من الدوبلكس"، المذاع على قناة "cbc"، ونستعرض أبرز تصريحاتها.

1- محدش بيدلعني

قالت الفنانة إلهام شاهين: "محدش بيدلعني إحنا غلابة منظر على الفاضي، أنا طيبة مش ست قادرة، بس بقف في الموقف ومش بتنازل عن حقي أبدًا".

2- باخد حقي بالأدب

أكدت إلهام أنها لا تترك حقها مطلقًا، موضحة: "بحب أخد حقي بالأدب، ومبسبش حقي لو حصل إيه طالما مش غلطانة، بحب القانون والذوق".

3- أنا مديونة للبنوك

قالت إلهام: "أنا مديونة للبنوك وماحدش بيجبلي شيكات ولا هدايا، كل فلوس شغلي حطيتها في الإنتاج، أول فيلم عملته خسر قولت لازم أعوض دخلت التاني خسر برضه".

4- قدمت 100 فيلم و60 مسلسلا

وعن أعمالها الفنية ذكرت: "نسيت حاجات عملتها أكيد ذهبت مع الريح، بس أنا قدمت 100 فيلم وتقريبًا 60 مسلسل بالمسرحيات".

5- علقة موت من المليجي

قالت إلهام إنها شاركت الفنان محمود المليجي في بطولة فيلم، وعن كواليس تصويره ذكرت: "ضربني قلم وبعدها علقة موت اتشقلبت وخدني من شعري عشان يطلع المشهد حلو".

6- عندي أصحاب حلوين

أكدت إلهام أنها تعتز بصداقاتها مع إيناس الدغيدي وهالة سرحان، وعلقت: "عندي شلة تجنن أصحابي حلوين أوي، إيناس حنينة أوي مش شريرة خالص، أصحابي جدعان وبعرف أعتمد عليهم.. هما ستات أقوياء مش أي كلام، لو قلبنا على حد يا ويله، بقالنا 30 سنة صحاب وممكن نموت أي حد يقرب لواحدة فينا".

7- بلبس شنط مضروبة

أوضحت إلهام أنها لا تعاني من عقدة ارتداء ملابس أو شنط ذات ماركات معروفة، موضحة: "ممكن ألبس حاجة مش غالية ومضروبة بس يكون شكلها حلو ماعنديش مانع إني أمسكها مش بحب العقد خالص".

8- فيلم في أبلة فاهيتا

أعلنت إلهام أنها ستشارك أبلة فاهيتا في عمل فني سيعرض خلال 2018، وفسرت تصريحها قائلة: "ده خبر حقيقي هانصور الفيلم في شهر فبراير، وهيكتبه تامر حبيب، بس دوري أكيد هيبقى أهم وأكبر من دور فاهيتا لأني أقدم منها بس مش أكبر سنًا".

وعلقت فاهيتا: "هنعمل فيلم نساء لا تأكل المفروم"، فردت إلهام: "عايزاني أنا أعمل فيلم لحمة مفرومة ده يتعمل صنية مكرونة باشاميل مش فيلم"، فبادرتها فاهيتا قائلة: "ما أنتي عملتي فيلم لحم رخيص، وأنا بنتج عشان الإيرادات مش زيك عايزة جوائز بس".

9- لساني بيوديني في داهية 

قالت إلهام إنها تتمنى أن تغير أشياء في شخصيتها، وذكرت منها: "لساني موديني في داهية.. أنا عيوبي كتير بس مش هاعرف أغير حاجة فيها، أنا عصبية وصراحتي بتزعل ناس مني، عندي بلاوي كتير بس ماوعدش أني هعرف أغيرها في 2018".

10- لما حد يعاكسني بديله درس في الأخلاق

قالت إلهام إنها ترد على أي معاكسات تتعرض لها، ولكن على طريقتها، وأوضحت: "أي حد بيعاكسني برد عليه بس بديله درس في الأخلاق، الناس مفروض يبقى عندها أخلاق ومتعاكسش، المعجبين يشوفوا الفن لكن مش لازم أرد عليهم في التليفون وأتصور معاهم كلهم".

 

 

 

 

 

 

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا